Чарговы дзень інфармавання адбыўся 21 чэрвеня ў Мікалаёўскім сельсавеце. У буйнейшыя населеныя пункты выехалі чатыры інфармацыйна-прапагандысцкія групы райвыканкама пад кіраўніцтвам адказных работнікаў раённага звяна. У іх складзе былі медыкі, прадстаўнікі праваахоўчых органаў і РАНС.
Прыём наведвальнікаў па асабістых пытаннях вёў намеснік старшыні райвыканкама Л. І. Лясовіч. Да яго і звярнулася прадавец магазіна ў Мікалаёве В. С. Федарэц. Яе непакоіць, што пасля дажджоў даезд да гэтай гандлёвай установы становіцца вельмі гразкім. Праблема старая, бо ў час будаўніцтва аграгарадка сотню-другую метраў шляху, па якому штодзень ходзяць амаль усе вяскоўцы, не паспелі падсыпаць.
Аказалася, што практычна ўсе групы таксама сутыкаліся з дарожнымі пытаннямі. Так, ёсць праблемны ўчастак пры пад’ездзе да Ліпаціна, аналагічная сітуацыя ў Баслаках, Турчыно, патрабуе рамонту дарожнае палатно на Дзянісава. Крыху пазней Л. І. Лясовіч і дырэктар ААТ “Мікалаёўскі” А. І. Кудрашоў праехалі па тых дарогах, якія патрабуюць падсыпкі ці грэйдзіравання, каб удакладніць аб’ём і выканаўцаў: зоймуцца гэтым спецыялісты ДРБУ-203 і мясцовая гаспадарка. Толькі зрабіць трэба нямала, на выкананне патрэбны час.
Старшыня сельскага Савета В. П. Шастакоў ведае мясцовыя праблемы. У іх ліку вызначэнне тлустасці малака, што закупляецца ў насельніцтва, патравы агародаў і нарыхтоўка дроў, асабліва для адзінокіх састарэлых. Насельніцтва завязе патрэбнае яму паліва. Гэтым сёлета актыўна займаюцца бытавікі з Дзісны, меліяратары з Язна, затое аслабіла намаганне лясніцтва, свой уклад уносяць прыватнікі, аднак іх паслугі значна даражэйшыя.
Сустрэчы ў населеных пунктах паказалі, што пералік патрэб вяскоўцаў значна шырэйшы. Напрыклад, жыхары Турчыно і Капыльшчына жадаюць пракласці ў вёску спецыяльны кабель, каб глядзець больш праграм тэлебачання. На іх просьбу сувязісты пакуль не адрэагавалі.
У адной з жыхарак Сакалова хату пачаў узмоцнена “есці” грыбок. Як ад яго ўратавацца? У Сіцькове вяскоўцаў непакояць начныя матацыклісты, якія з’язжаюцца на дыскатэку. Некаторым састарэлым патрэбна дапамога сацыяльных работнікаў. Забяспечыць яе рэальна, толькі паслуга гэта платная.
Жыхары Баслакоў хацелі б памяняць пашу для ўласнага статка. Ім паабяцана зрабіць гэта ў наступным годзе. І абяцанне яшчэ раз пацверджана. Угоддзі для гэтага будуць перазалужаны. А яшчэ ў гэтай вёсцы некаторыя жыхары не хочуць прывязаць сабак. Іх наведае ўчастковы.
Добраўпарадкаванне трэба праводзіць у Дарожкавічах, дзе з’явілася звалка.
Адна з мнагадзетных сем’яў хацела б мець дзіцячую пуцёўку ў санаторый. Гэта рэальна, толькі ўмовы яе выдзялення і жаданне сям’і па трэміне могуць не супасці.
У некаторых населеных пунктах вялася размова пра добраўпарадкаванне могілкаў і ўборку на іх дрэў. Справа гэта не простая: калі ўбіраюць дрэва спецыялісты, за гэта давядзецца заплаціць мільён рублёў. Таму размова павінна ісці і пра сродкі на такія работы.
Усе пытанні, узнятыя насельніцтвам у час дня інфармавання, узяты на кантроль. Дадаткова будзе вызначацца магчымасць іх рэалізацыі, удакладняцца выканаўцы і тэрміны.
Намеснік старшыні райвыканкама Л. І. Лясовіч выкарыстаў паездку ў Мікалаёва і для таго, каб азнаёміцца з ходам рэканструкцыі фермы “Навасёлкі”. У адным з кароўнікаў тут аднаўляюцца перакрыцці і дах. Неабходныя матэрыялы для гэтага закуплены, ёсць брусы, дошкі, металічныя трубы на калоны, уцяпляльнік. Неўзабаве завязуць страпілы. Работы вядуць будаўнікі з Полацка. Яны ж павінны да верасня правесці аналагічныя работы і ў другім памяшканні. Уласныя будаўнікі заняты на іншых фермах.
Л. МАТЭЛЕНАК.
