Калі ў душы свеціць сонца, то на шэрыя дні, зацягнутыя густымі хмарамі і авеяныя лёгкай імглой, звяртаецца мінімум увагі. У клубе "Бажэна" заўсёды сонечна, ясна і цёпла. Як адзначыла на чарговым пасяджэнні старшыня аб'яднання Валянціна Цярэнцьеўна Рус, тут збіраюцца тыя, хто не лічыць свае гады, каму ўласцівыя аптымізм, бадзёрасць і пачуццё гумару.
"Сяброўка Восень" — пад такім дэвізам 25 лістапада праходзіла чарговая сустрэча бажэнаўцаў. Конкурсы, песні, прыпеўкі, вершы і размовы былі пра пару года, якая спачатку адорвае багатым ураджаем і асыпае золатам лістапада, а потым ахінае густымі туманамі і навявае сум манатонным шумам працяглых дажджоў.
Толькі на позневосеньскі сплін у бажэнаўцаў часу не было. Актывісты клуба Валянціна Цярэнцьеўна Рус, Рэгіна Васільеўна Аланцьева і Анастасія Ермалаеўна Лукоўская распрацоўвалі сцэнарый сустрэчы: падбіралі загадкі і конкурсы, песенны рэпертуар, віншаванні для імяніннікаў. Увосень святкуюць дні нараджэння Ларыса Рыгораўна Барок, Ліра Кірылаўна Кураш, Анастасія Ермалаеўна Лукоўская, Яўгенія Калікстаўна Корсак, Рэгіна Васільеўна Аланцьева, Вера Мікалаеўна Матэленак, Яніна Іосіфаўна Савіцкая, Ніна Міхайлаўна Федуковіч. Прыйсці на сустрэчу атрымалася не ва ўсіх, аднак падарункі абавязкова знойдуць сваіх адрасатаў. Самую вялікую порцыю віншаванняў і сюрпрызаў атрымаў нязменны музыкант клуба Мікалай Міхайлавіч Федуковіч, які таксама нарадзіўся асенняй парой. Жанчыны спявалі ў яго гонар песні і прыпеўкі, а маэстра з задавальненнем падыгрываў на гармоніку.
Важным пунктам у святочнай праграме значыліся выбары каралевы Восені. Гэты тытул разам з прыгожай каронай з кляновых лістоў атрымала Алена Іванаўна Хаткевіч. Для яе восень — пара асаблівая. З пачаткам верасня былая настаўніца рускай мовы і літаратуры святкавала пачатак новага навучальнага года. Трыццаць два гады, прысвечаныя любімай справе, пакінулі шмат добрых успамінаў. З таго часу, як для педагога празвінеў апошні званок, ідзе трэці дзясятак, а словы ўдзячнасці ад колішніх вучняў Алена Іванаўна чуе і цяпер.
Калі размовы пра восень у прыродзе плаўна перайшлі ў разважанні пра восень у жыцці, удзельнікі сустрэчы сталі разам шукаць лекі ад старасці. Рэцэпт атрымаўся простым і для кожнага даступным: развіваць інтэлект, забяспечваць сябе дапусцімымі фізічнымі нагрузкамі, не зайздросціць і нікому не рабіць і не жадаць зла, дапамагаць людзям, браць у памочнікі добрую песню, з якой справа спорыцца і на душы святлее. Сродак гэты вельмі дзейсны, калі прымаць яго кожны дзень хаця б пакрыху. Тады пашпартныя дадзеныя стануць фармальнасцю, а восень будзе толькі на дварэ.
Кацярына СУРАВЕЦ.