Марозным лютаўскім днём у раённы раддом завітала “дэлегацыя” ў складзе намесніка галоўнага ўрача ЦРБ Святланы Васільеўны Біруковай, старшыні ГА “Белая Русь” Алены Венядзіктаўны Шамёнак і старшыні РК ГА БРСМ Марыны Паўлаўны Кашкур. Іх візіт быў вельмі прыемным — тут 30 студзеня на свет з’явіліся двайняты (дарэчы, папярэднія нарадзілася ў раёне больш чатырох гадоў назад!)
Шчаслівыя бацькі, Ганна і Максім, жывуць у вёсцы Баслакі. У сям’і ўжо было трое дзяцей: Насця, Арцём і Таццянка. Імёны для нованароджаных яшчэ не прыдумалі. Як адзначыла Ганна Георгіеўна, хлопчыкаў у іх сям’і называе муж. Яшчэ зусім маленькія, яны ўжо паказваюць характар. Адзін карапуз спакойны, другі больш актыўны.
Маці хлопчыкаў атрымала цёплыя віншаванні і падарункі ад “Белай Русі” і БРСМ.
Алена ВАРОНІНА.