Участак вул. Камуністычнай у райцэнтры ад Кірава да Кастрычніцкай стаў часова малапраезным: тут працуе шмат спецыяльнай тэхнікі. На сродкі, атрыманыя ад уплаты збору на допуск транспартных сродкаў да дарожнага руху, днямі пачаўся капітальны рамонт 350-мятровага "кавалка" адной з галоўных магістраляў Міёр.
Заказчыкам выступае УП ЖКГ, камунальнікі таксама заказвалі праект, генеральны падрадчык — ДРБУ-203. Аднак да справы яшчэ прыцягнуты будаўнікі ПМК-55 і Міёрскага ПМС. Са сталіцы дастаўлена дагэтуль не знаёмая ў нашых мясцінах машына нямецкай вытворчасці для зняцця верхняга слою асфальту — дарожная фраза.
Дырэктара ўпраўлення капітальнага будаўніцтва В.Ф. Падаляку прашу расказаць чытачам раённай газеты аб праекце абнаўлення цэнтра горада.
— Аб'ём плануемых работ даволі значны, — адзначае Валерый Фёдаравіч, — намячаецца ўстанавіць кансольныя свяцільнікі з энергазберагальнымі лямпамі, старыя аэрадромныя пліты, якія месцамі пачалі разбурацца, заменьваюцца на тратуарную плітку. Хаця і яны потым будуць выкарыстаны на гаспадарчыя патрэбы. Ужо пачаўся дэмантаж старога і ўстаноўка новага бартавога каменя, так спецыялісты называюць бардзюры, якіх трэба 760 пагонных метраў.
Дарэчы, плошчу ля РДК аддзеліць ад Камуністычнай тратуар, упрыгожаны перасоўнымі кветнікамі. Для праходу святочных калон і праезду транспарту застануцца 5-мятровыя прасветы. На пешаходным пераходзе прадугледжваецца невялікае павышэнне — сучасны "ляжачы паліцэйскі". Пры ўстаноўцы бардзюраў, уладкаванні тратуараў забяспечваюцца патрабаванні даступнасці для інвалідаў-калясачнікаў.
Каб рух пешаходаў і транспарта на абноўленым участку вуліцы быў гарантавана бяспечным, намечана ўстаноўка больш за 200 метраў бар'ернага агароджвання і 71 дарожнага знака, у тым ліку 14 святлодыёдных, што свецяцца ў цемры. На першым этапе ўстаноўка светлафора не праектуецца, але будуць закладзены кабелі, каб ў далейшым гэта стала магчымым без пашкоджання новага дарожнага пакрыцця.
Нарэшце, праект прадугледжвае "новае дарожнае адзенне" з асфальта-бетоннай сумесі агульнай таўшчынёй у 10 сантыметраў на плошчы 6880 квадратных метраў.
Асноўныя работы будуць закончаны на Новага года, акрамя ўкладкі верхняга слою асфальту, для гэтага выберам больш падыходзячы час.
Гутарыў Леанід МАТЭЛЕНАК.