Гандлёвыя рады з разнастайнай прадукцыяй размяшчаліся на паўвострае ад самага ўваходу. Прыцягвалі ўвагу яркія цацкі для дзяцей, яркія ўпрыгожанні і абярэгі, прыгожыя вырабы з дрэва, бісеру, поўсці і іншых матэрыялаў. А побач з канцэртнай пляцоўкай удзельнікаў і гасцей свята Дня горада віталі супрацоўнікі цэнтральнай раённай бібліятэкі. Лічыце, гэта не самае лепшае месца для літаратуры. Памыляецеся!

Раённая бібліятэка—пастаянны ўдзельнік розных мерапрыемстваў, што ладзяцца ў горадзе, і заўсёды карыстаецца папулярнасцю.
—Наведвальнікі цікавяцца прадстаўленай на выставах літаратурай і вельмі любяць нашы латарэі,—адзначае загадчыца аддзела абслугоўвання і інфармацыі Наталля Калеснік і запрашае на бібліяпрагулку:—Вось тут кла-сіка, якая заўсёды актуальная. Разам з вядомымі рускімі аўтарамі—Дастаеўскім, Пушкіным, прапаноўваем творы замежных класікаў—Брэдберы, Саган і многіх іншых. Цікавыя творы сучасных пісьменнікаў, можна азнаёміцца з літаратурай пра Міёрскі і суседнія раёны, нашу краіну. Прадстаўлены кнігі па арыгамі, бісерапляценні, кулінарыі, якімі цяпер захапляюцца многія, шырокі выбар літаратуры па псіхалогіі. Адбіраючы кнігі для выставы, арыентаваліся на маладое пакаленне. У Год моладзі на іх асноўная ўвага.

Хоць бібліятэчная пляцоўка мела назву "Моладзевы свет: цікава пра галоўнае", заходзілі не яе і дарослыя, і дзеці. Разам з бібліяпрагулкай сюды ўключаліся PR-акцыя "Час чытаць"—знаёмства з рэкламнай прадукцыяй і паслугамі бібліятэкі, акцыя-падарунак "Кніга ў добрыя рукі", калі можна было атрымаць на памяць кнігу. Асаблівым попытам карысталася латарэя "Чытай класіку сёння", якую праводзілі юныя памочніцы бібліятэкараў Ліза Чарнаок, Маша Няхаева і Каця Катовіч. Па меркаванні дзяўчат, чытаць кнігі сучаснай моладзі трэба. Літаратура развівае граматнасць, пашырае кругагляд і проста прыносіць задавальненне.
А значыць, кніга ў любым месцы і ў любы час знойдзе ўдзячнага чытача.

Кацярына РЫНКЕВІЧ.
Фота Казіміра БЛАЖЭВІЧА.