Андрэй Абрамовіч у студзені дэмабілізаваўся з арміі. Служыў ён у Віцебску, у знакамітым дэсантным падраздзяленні.
Непрыкметна праляцелі паўтара года. За гэты перыяд салдат асвоіў воінскую спецыяльнасць. Ён снайпер. Скакаў з парашутам. Па яго словах, аб’ездзіў усю Беларусь, прымаў удзел у розных вучэннях.
Памятная падзея для Андрэя — ваенны парад 3 ліпеня 2011 года.
— Мы былі нядрэнна падрыхтаваны, — расказвае былы салдат. — Два месяцы непадалёку ад Мінска трэніраваліся. Здаецца, усё прайшло добра. Атрымаў падзяку ад прэзідэнта краіны.
Пацікавіўся ў Андрэя службай, спытаў, што дала яму армія?
— Адчуў сябе больш дарослым, адказным, — патлумачыў субяседнік. — Навучыўся вытрымцы — маральнай і фізічнай. Лічу, што пасля службы ў арміі я стаў іншым чалавекам.
Андрэй на службе дарос да сяржанта, яго прызначылі камандзірам аддзялення. Цяпер займаецца працаўладкаваннем. Пасля заканчэння Цвецінскай СШ вучыўся ў Віцебскім дзяржаўным тэхналагічным каледжы, дзе атрымаў спецыяльнасці станочніка, столяра, рамшчыка.
Андрэй жыве ў вёсцы Цвеціна разам з мамай Вольгай Анатольеўнай Усціновіч, дзядулем і бабуляй. Дапамагае ім па хатняй гаспадарцы.
Л. НАВАСЕЛЬСКІ.