У невялічкай вёсцы Фралова ніякіх сацыяльных аб'ектаў. Да аграгарадка Туркова каля 6 кіламетраў. Аднак гэта не напалохала маладога механізатара Дзмітрыя Клешчанка, які год таму пераехаў сюды з Дзісны, дзе здымаў жыллё і працаваў у прыватніка. Разам з жонкай Валянцінай зрабілі рамонт у доме, а праз нейкі час нарадзілася Дзіяначка, якой ужо 8 месяцаў. Цяпер малады тата працуе ў сельгаспрадпрыемстве "Туркова" і ні пра што не шкадуе.
— Напачатку выконваў работы толькі на трактарах з невялікай магутнасцю рухавіка, а ў сельгасвытворчасці павысіў кваліфікацыю. Цяпер магу кіраваць энерганасычанымі "Беларусамі", корма- і збожжаўборачнымі камбайнамі.
Родам Дзмітрый са Светлагорска. У Дзісну прыехаў да сястры, якая крыху раней атабарылася на Міёршчыне. Працаваў у прыватніка разам з хлопцам з Туркова, які пазнаёміў яго са сваім братам. Антон Протас працаваў механізатарам і прапанаваў Дзмітрыю перабрацца ў вёску.
— Ёсць у хлопца мэтанакіраванасць, імкненне дасягаць намечанага,—заўважае дырэктар сельгаспрадпрыемства А. К. Шокель. — Дысцыплінаваны, акуратны, талковы. Як працаўладкаваўся, далі яму амаль разабраны "МТЗ-1221". Дзмітрый замяніў рухавік, скрынку перадач, задні мост, гуму на колах. Словам, удыхнуў у трактар новае жыццё. Да тэхнікі адносіцца беражліва. Дарэчы, ёсць з каго браць прыклад, бо большасць нашых трактарыстаў шануюць "калгасную" маёмасць, як уласную.
За год Дзмітрыю даводзілася выконваць у асноўным транспартныя работы: падчас корманарыхтоўкі перавозіў "зялёнку", дастаўляў сена ў рулонах…
Сёлета ўпершыню ўдзельнічае ў пасяўной. Напачатку развозіў па палетках КАС для запраўкі "Дзвіны". Цяпер задзейнічаны з чызелем на падрыхтоўцы глебы.
— Калі і надалей будзе так старацца, добрым хлебаробам стане, — прыкмячае Аляксандр Казіміравіч. — А для таго, каб авалодаць майстэрствам у рабоце са шматлікімі прычапнымі і навяснымі сельгасагрэгатамі, спатрэбіцца не адзін год.
Кіраўнік гаспадаркі задаволены, што более маладых работнікаў — будзе замена тым, хто адыходзіць на заслужаны адпачынак.
Эліза БЛАЖЭВІЧ.
На здымку: малады
механізатар ААТ "Туркова" Дзмітрый Клешчанка.
Фота К. БЛАЖЭВІЧА.