Міністэрства прыродных рэсурсаў і аховы навакольнага асяроддзя праводзіць конкурс на лепшую публікацыю па экалагічнай тэматыцы "Наш агульны дом". На яго прадастаўляюцца нарысы, артыкулы, рэпартажы, агляды, замалёўкі, заметкі і каментарыі аб беражлівых адносінах да прыроды, навядзенні парадку на зямлі, добраўпарадкаванні населеных пунктаў, абыходжанні з адходамі, ахове водных рэсурсаў, атмасфернага паветра, жывёльнага і расліннага свету, укараненні новых тэхналогій у галіне экалогіі, захаванні помнікаў прыроды і іншых матэрыялаў па пытаннях аховы навакольнага асяроддзя і рацыянальнага выкарыстання прыродных рэсурсаў.
У конкурсе прымаюць удзел фізічныя асобы — вучні, аматары, прафесіяналы. Будуць ацэньвацца публікацыі ў перыядычным друку за перыяд з 15 мая летась да 15 мая сёлета. Іх неабходна суправаджаць інфармацыйным лістком з указаннем намінацыі, катэгорыі, асабістых дадзеных аўтара, яго ўзросту, паштовага адраса і тэлефона.
Конкурсныя работы могуць быць прадстаўлены ў выглядзе газетнай ці часопіснай выразкі, рукапісу ці друкаванага тэкста з абавязковым указаннем перыядычнага выдання, у якім твор надрукаваны, яго нумара і даты выпуску. Кожная публікацыя павінна мець толькі аднаго аўтара.
Конкурс праводзіцца ў перыяд да 5 жніўня. У раённую інспекцыю прыродных рэсурсаў і аховы навакольнага асяроддзя матэрыялы трэба прадаставіць да 20 чэрвеня. Журы будзе ўлічваць паўнату раскрыцця тэмы, колькасць работ, іх выхаваўчую і грамадскую каштоўнасць, яркасць і арыгінальнасць. Пераможцы вызначаюцца па найбольшай суме балаў па 10-бальнай сістэме. Пераможцаў абласнога і рэспубліканскага этапаў чакаюць дыпломы і грашовыя прэміі.
Н. ЛАЎРЫНОВІЧ,
спецыяліст райінспекцыі.