У рэдакцыю звяртаюцца чытачы газеты з просьбай патлумачыць, як і дзе можна нарыхтаваць дровы для ўласных патрэб. Вось які адказ дае на гэтыя пытанні адміністрацыя Дзісенскага лясгаса.
Водпуск нарыхтаваных дроў для насельніцтва робіцца з высечак прамежкавага карыстання і іншых. У залежнасці ад пароды драўніны цана кубічнага метра пры даўжыні бярвенняў 2 м складае ад 11200 да 14700 рублёў без уліку тралёўкі (кошт тралёўкі 9600 рублёў). Вывазку такога паліва пакупнікам трэба рабіць уласным транспартам. У гэтым выпадку ў лясніцтве выпісваецца квітанцыя-накладная, у якой указваецца колькасць драўніны, парода, кошт, а таксама тэрміны транспарціроўкі, якія лясніцтва ўстанаўлівае ў залежнасці ад колькасці паліва, сезону вывазкі і іншых умоў, але не больш двух месяцаў з дня продажу.
Вывазка дроў дазваляецца толькі ў прысутнасці на дзялянцы работніка дзяржаўнай лясной аховы, які абавязаны зрабіць адзнаку ў квітанцыі-накладной аб колькасці вывозімай драўніны. Калі спажывец не вывез нарыхтаванае паліва ва ўстаноўлены тэрмін і не звярнуўся з пісьмовай заявай у лясгас аб прадастаўленні адтэрміноўкі на яе вывазку ці не выканаў вызначаныя работы ў сувязі з прадастаўленай адтэрміноўкай, нарыхтаваная але не вывезеная ва ўстаноўлены тэрмін драўніна бязвыплатна паступае ў распараджэнне лясгаса і рэалізуецца ім ва ўстаноўленым парадку.
ДЛГУ “Дзісенскі лясгас” таксама дастаўляе дровы ўласным транспартам у адпаведнасці са спісам гарпаліўзбыту, а таксама па заяве пры звароце ў лясніцтва. Кошт такога паліва ад 140 да 170 тысяч рублёў у залежнасці ад транспарту і аб’ёму.
Нарыхтоўка дроў насельніцтвам на карані па ордэру на дробны водпуск дапускаецца ў парадку ўборкі захламленасці, высечкі сухастойных, ветравальных і бураломных дрэў у аб’ёме да 10 кубічных метраў. Іх кошт складае ад 70 да 500 рублёў за кубаметр.
Для атрымання ордэра на дробны водпуск неабходна звярнуцца ў лясніцтва з заявай. Дакумент выпісваецца ў лясніцтве, першы экземпляр выдаецца лесакарыстальніку, які абавязаны мець яго пры сабе пры нарыхтоўцы і вывазцы паліва. У дакуменце ўказваюцца тэрміны нарыхтоўкі і вывазкі, якія неабходна захоўваць. Пры выдачы ордэра работнікі лясніцтва абавязаны азнаёміць лесакарыстальніка з правіламі водпуску драўніны на карані і пажарнай бяспекі ў лясах.
Па заканчэнні нарыхтоўкі драўніны работнік дзяржаўнай лясной аховы абмярае дровы і аглядае месца высечкі. Толькі пасля гэтага дазваляецца іх вывозіць.
Па пытаннях набыцця драўніны на дровы ў нарыхтаваным выглядзе і выпіскі ордэра на дробны водпуск неабходна звяртацца ў лясніцтва.
