У нядзелю, 14 кастрычніка, у спартзале “Атлант” усе, хто займаецца на секцыі па валейболе ў трэнера ДЮСШ Уладзіміра Віктаравіча Вішнякова, — дзяўчаты ад 12 год і старэйшыя і жанчыны з групы “Здароўе” — адзначалі Дзень маці на спартпляцоўцы. У турніры ўдзельнічалі тры зборныя каманды: дзяўчаты з ДЮСШ 1998-1999 гадоў нараджэння, старэйшыя з малодшымі і жанчыны групы “Здароўе”.
Адкрыў спаборніцтвы прывітальнымі словамі і віншаваннем трэнер і арганізатар мерапрыемства Уладзімір Віктаравіч Вішнякоў. Пасля агучвання ўмоў сустрэч і нядоўгай размінкі разгарэлася сапраўдная барацьба. Ніхто не хацеў уступаць. Гульні праходзілі азартна, эмацыянальна, без яўнай перавагі адзін над другім.
У выніку больш чым трохгадзіннай барацьбы вызначыўся пераможца — каманда старэйшых дзяўчат з малодшымі.
Без узнагарод ніхто не застаўся, а гэта былі салодкія пачастункі — торты і цукеркі. Усе ўдзельнікі атрымалі зарад бадзёрасці і энергіі. Дамовіліся, што такія спаборніцтвы будуць праводзіцца рэгулярна.
Таццяна АРСОБА,
капітан старэйшай каманды.