Аказалася, што ў постіндустрыяльным грамадстве з’явіўся прынцыпова новы псіхалагічны тып чалавека. Гэта не нейкія там іпахондрыкі ці экстраверты, а людзі “Д”. Шкода ад іх вялізная, бо яны псуюць жыццё іншым, але і сабе таксама.
Дык вось, калі вас усё непакоіць, раздражняе і выбівае з каляіны, то вы і ёсць той самы новы псіхалагічны тып. Калі ад навакольных спраў пачынае калоць у сэрца, то да ўрача вы не пойдзеце, бо незадаволены ўсімі медыкамі. А ў выніку — інфаркт.
Даследаванні псіхолагаў паказалі, што да такой катэгорыі адносіцца прыкладна кожны пяты жыхар планеты. Ім уласцівы пераважна негатыўныя эмоцыі — трывожнасць, раздражнёнасць, варожасць, злосць, дрэнны настрой. Такія людзі неахвотна дзеляцца сваімі пачуццямі з іншымі, трымаюць незадаволенасць у сабе. Калі да гэтага дадаць вялікія прафесійныя амбіцыі, няўменне правільна ацаніць няўдачы і зрабіць карысныя вывады з негатыўнага вопыту, то можна ўявіць, які ў іх узровень стрэсу. У выніку дробязь ператвараецца ў невырашальную праблему. Утрыманне ў крыві гармона стрэсу картызолу не дазваляе ім расслабіцца і пераключыцца на карысную справу. Таму павышаецца артэрыяльны ціск, паскараецца сэрцабіццё.
Калі вы дрэнна кантактуеце з людзьмі, замкнуты чалавек, які часта ўзбуджаны і ў дрэнным настроі — вы і ёсць той чалавек “Д”. Значыць, у вас магчымы інфаркт, высокая рызыка ўскладненняў пасля кардыялагічных захворванняў і гіпертаніі.
Каб пазбегнуць гэтых небяспек, трэба больш рухацца, сачыць за харчаваннем, адмовіцца ад курэння. А яшчэ неабходна часцей хваліць сябе і добразычліва адносіцца да іншых, пазітыўна ўспрымаць навакольнае жыццё.
Псіхолагі сцвярджаюць, што аптымісты лягчэй пераносяць хваробы і даўжэй жывуць. Станавіцеся імі.
Па матэрыялах друку.