Страта зроку — страшэнны ўдар для чалавека. Здаецца, што разам з пагаслым у вачах святлом незваротна адыходзяць і ўсе радасці жыцця. Але гэта не так. Інваліды па зроку — мужныя людзі, яны пераадольваюць цяжкасці, што спасылае ім лёс, імкнуцца да перамогі, маюць волю і жаданне выстаяць. Яны вучацца наноў жыць, працаваць, радавацца і верыць у свой лёс, спадзявацца на лепшае.
Менавіта з такой мэтай 29 чэрвеня ў Віцебску праводзіўся абласны адборачны тур фестываля эстраднай творчасці інвалідаў па зроку “Запалі сваю зорку”. Гонар нашага раёна абараняў Мікалай Мозылеў з Дзісны — жыхар аддзялення кругласутачнага знаходжання. Прыемна, што мужчына дадому вярнуўся з заахвочвальным прызам і дыпломам “За артыстызм”.
Словы падзякі выказваем дырэктару ТАА “НікаПрэстыж-Плюс” Паўлу Андрэевічу Нікіценку і індывідуальнаму прадпрымальніку Дзмітрыю Мікалаевічу Маскаленку за дапамогу ў арганізацыі паездкі, а выкладчыку Дзісенскай музычнай школы Канстанціну Сяргеевічу Белаусаву за музычнае суправаджэнне нумароў, Ірыне Віктараўне Мільяновіч, загадчыцы аддзялення кругласутачнага знаходжання, за разуменне і падтрымку. І наогул, усім тым, хто адклікнуўся на просьбу і дапамог у арганізацыі падрыхтоўкі да конкурсу, паездкі і выступлення.
Радуе, што ўсё ж добрых людзей большасць, нераўнадушных да чужога гора, гатовых прыйсці на дапамогу, “падставіць плячо”. Бяда можа здарыцца з кожным, таму давайце будзем цз цярпеннем і ўвагай адносіцца да тых, хто чымсьці ад нас адрозніваецца, бо толькі ад акружаючых залежыць, наколькі ўтульна і зручна будзе адчуваць сябе чалавек, пакрыўджаны лёсам.
Л. БАТАРЧУК,
старшыня раённай
арганізацыі АТ “БелТІЗ”.