Здаецца, толькі ўчора празвінеў першы званок, а ўжо і другая чвэрць на зыходзе. У апошнія дні кастрычніка ў Мікалаёўскай школе прайшоў збор дружыны “Жывая сувязь часу”, прымеркаваны да 90-годдзя піянерскага руху на Віцебшчыне.
У невялічкім класным пакоі сабраліся вучні і госці — ганаровыя піянеры нашай школы — Валянціна Зыгмунтаўна Красько, Марыя Яўгенаўна Булаўская, Вольга Мікалаеўна Пазняк.
З уступным словам выступіла педагог-арганізатар Наталія Герасімаўна Балаш. Яна паведаміла аб стане піянерскай арганізацыі ў рэспубліцы, вобласці. Засяродзіла ўвагу на раённай піянерскай арганізацыі, паведаміла аб праводзімых мерапрыемствах, планах, дасягненнях.
Піянеры атрада “Дружба” расказалі аб дзейнасці сучаснай піянерскай арганізацыі, шэфстве і цімураўскай дапамозе.
Госці падзяліліся сваімі ўспамінамі. В. З. Красько доўгі час працавала дырэктарам Дома піянераў у Дзісне. Яна расказала, як раней прымалі ў піянеры. Нават прынесла фотаальбом. З якой цікавасцю мы яго разглядвалі!
М. Я. Булаўская, якая працавала піянерважатай у Кублішчынскай школе, заклікала піянераў быць добрымі, справядлівымі, працалюбівымі, стараннымі.
В. М. Пазняк, выпускніца нашай школы, у свой час была старшынёй савета дружыны імя Паўліка Марозава. Яна падзялілася ўспамінамі пра жыццё піянерскай дружыны і атрадаў. Так склаўся лёс, што пасля заканчэння Полацкага педагагічнага вучылішча Вольгу Мікалаеўну накіравалі працаваць піянерважатай у Верхнядзвінскі раён. Успомніла, што ў той час гальштук як піянеры, так і важатая павінны былі насіць кожны дзень. А на святы, зборы, лінейкі апраналі і піянерскую форму.
Немагчыма ўспамінаць тыя далёкія і шчаслівыя часы без хваляванняў.
А яшчэ гэты дзень вельмі значны для вучаніцы 2 класа Юліі Карніцкай, таму што яна стала акцябронкам. Валянціна Зыгмунтаўна Красько прышпіліла ёй чырвоную зорачку і пажадала добрай вучобы і плённай працы.
Мы прагледзелі прэзентацыю пра сімвалы, атрыбуты піянерыі 1970-1990 гадоў. Збор дружыны закончыўся выступленнем піянераў атрада імя Марата Казея. Усе госці ў знак удзячнасці атрымалі кветкі і словы падзякі.
Піянеры дружыны
“Сонечная”
Мікалаёўскай д/с-БШ.
