16 сакавіка “прамую лінію” праводзіў намеснік дырэктара—начальнік аддзела рознічнага бізнесу ЦБП №213 філіяла №214 ААТ “ААБ Беларусбанк” С. А. Ерафееў. Яму задалі наступныя пытанні:— Я пенсіянер, ці магу зняць са свайго пенсійнага рахунку грошы па пашпарту, калі знаходжуся ў іншым горадзе Беларусі?— Для атрымання часткі грашовых сродкаў з укладу “Пенсійны” можаце звярнуцца ў любое аддзяленне “Беларусбанка” на тэрыторыі рэспублікі. Неабходна прад’явіць дакумент, які засведчвае асобу (пашпарт, пасведчанне бежанца, від на жыхарства) і дагавор банкаўскага ўкладу ці выпіску па рахунку, якая ўтрымлівае апошнюю наяўна-грашовую аперацыю.
— Ці магу я праверыць праз інтэрнэт рэштак грашовых сродкаў на асабовым рахунку і як гэта зрабіць?— Доступ да тэрміновых банкаўскіх укладаў ва ўстановах “Беларусбанка” праз інтэрнэт цяпер немагчымы. Мы прапануем фізічным асобам паслугу “Інтэрнэт-банкінг”, пры падключэнні да яе трымальнікі пластыкавых картак ААТ “ААБ Беларусбанк” маюць магчымасць прагляду рэшткаў грашовых сродкаў на карт-рахунку і гісторыі плацяжоў па відах паслуг, якія ажыццёўлены ў сістэме, а таксама ўплаты плацяжоў за паслугі сувязі, камунальныя, інтэрнэт і інш. Падрабязнасці атрымаеце ў нашым ЦБП і яго аддзяленнях, ці на афіцыйным сайце www.delarusbank.minsk.by.
— У майго сына льготны крэдыт на будаўніцтва жылога дома. Калі ён пачынаў яго ўзвядзенне, у сям’і было адно дзіця, а цяпер нарадзілася другое. Якую фінансавую падтрымку дзяржавы ён можа атрымаць?— У выпадку нараджэння дзіцяці на працягу будаўніцтва жылога памяшкання, ажыццяўляецца пераразлік велічыні льготнага крэдыту з пачатку крэдытавання ў бок павелічэння зыходзячы з нарматыву 20 кв. м на дзіця, якое нарадзілася. Пры гэтым унясення змяненняў у спісы льготнага крэдытавання не патрабуецца. У выпадку, калі сям’я сына з’яўляецца маладой, то ў адпаведнасці з указам №185 ад 14.04.2000 г. ёй аказваецца фінансавая дапамога дзяржавы ў пагашэнні запазычанасці па льготнаму крэдыту ў памеры 20% ад астатку, які склаўся на дату звароту крэдытаатрымальніка ў банк.
— Я раней брала ў вашым банку крэдыты, заўсёды датэрмінова іх пагашала. Цяпер хачу таксама ўзяць крэдыт. Ведаю, што іншыя банкі даюць іх без паручальнікаў. А вы прадастаўляеце такія крэдыты?— Рашэнне аб прадастаўленні крэдыту, у тым ліку аб спосабе і дастатковасці забеспячэння па крэдытнаму дагавору, прымае крэдытны камітэт ЦБП з улікам індывідуальнага падыходу да кліента. Пры гэтым аналізуюцца крэдытная гісторыя крэдытаатрымальніка, у тым ліку ў іншых банках, дысцыпліна пагашэння раней атрыманых крэдытаў, інфармацыя аб наяўнасці пратэрмінаванай запазычанасці і інш., што сведчыць аб магчымасці пагасіць крэдыт.
— З 16 сакавіка змянілася стаўка рэфінансавання, цяпер яна 12%. Скажыце, а па ўкладах таксама стаўкі павялічацца?— Так, павелічэнне стаўкі рэфінансавання выклікае павелічэнне працэнтных ставак па ўкладах у беларускіх рублях, велічыня даходу па якіх залежыць ад стаўкі рэфінансавання. Прычым, стаўкі па заключаных да 16 сакавіка дагаворах тэрміновага банкаўскага ўкладу, памяняюцца аўтаматычна. Калі ў вас грошы захоўваліся на ўкладзе “Ваш выбар” пад 15,5%, цяпер яны аўтаматычна будуць захоўвацца пад 17% гадавых. Акрамя таго, праўленне ААТ “ААБ Беларусбанк” прыняло рашэнне аб павелічэнні працэнтнай стаўкі па ашчадных сертыфікатах — цяпер гэтыя каштоўныя паперы прыносяць даход у 17% гадавых.
— Якім чынам можна папоўніць карт-рахунак, адкрыты ў ААТ “ААБ Беларусбанк”?— Гэта можна зрабіць наступным чынам:
1) з выкарыстаннем пластыкавай карткі банка:
- наяўнымі грашыма ў любым аддзяленні “Беларусбанка”. За такую аперацыю ўзнагароджанне з кліента не спаганяецца;
- шляхам пераводу грашовых сродкаў з аднаго карт-рахунку на другі, адкрытыя ў “Беларусбанку”, у банкаматах і інфакіёсках банка, а таксама з дапамогай паслуг М-банкінг і Інтэрнэт-банкінг. Для правядзення аперацыі неабходна ведаць нумар і тэрмін дзеяння карткі атрымальніка пераводу (гэтая інфармацыя змешчана на асноўным баку карткі атрымальніка пераводу). За перавод грашовых сродкаў з карт-рахунку на карт-рахунак спаганяецца ўзнагароджанне ў 1,5% ад сумы аперацыі.
2) без выкарыстання пластыкавай карткі:
- шляхам пераводу грашовых сродкаў у рамках банкаўскага пераводу. Для гэтага адправіцелю неабходна ведаць наступныя рэквізіты: найменне і нумар рахунка ўстановы банка, у якім адкрыты карт-рахунак пераводу атрымальніка, код установы банка, нумар карт-рахунку, прозвішча, імя і імя па бацьку яго ўладальніка. Гэтая інфармацыя ўтрымліваецца ў дагаворы карт-рахунку атрымальніка пераводу.
Перавод грашовых сродкаў на карт-рахунак, які адкрыты ў ААТ “ААБ Беларусбанк”, ажыцяўляецца ў любым аддзяленні “Беларусбанка” без спагнання ўзнагароджання пры прад’яўленні дакумента, які засведчвае асобу.
— Ці можна здымаць грошы з карткі “Беларусбанка” ў банкаматах іншых банкаў? Колькі працэнтаў за гэта бяруць?— Трымальнікі пластыкавых картак ААТ “ААБ Беларусбанк” маюць магчымасць здымаць наяўныя грашовыя сродкі без выплаты ўзнагароджання ў банкаматах Нацбанка, ААТ “Белінвестбанк”, “БПС-банк” і “Белаграпрамбанк”.
— Я пастаянна аплачваю камунальныя паслугі ў “Беларусбанку”. Чуў, што маючы пластыкавую картку, можна рабіць гэта не выходзячы з дому.—Сапраўды. Для гэтага патрэбен камп’ютар, падключаны да інтэрнэта. Для рэгістрацыі ў сістэме “Інтэрнэт-банкінг” неабходна звярнуцца ў аддзел рознічнага бізнесу ЦБП №213 з дакументам, які пацвярджае асобу, і пластыкавай карткай, што эмітавана банкам. Вы запоўніце анкету-заяву і атрымаеце імя карыстальніка (Login), пароль (Password) і карту кодаў. Кошт рэгістрацыі—10000 рублёў, для студэнтаў дзённай формы навучання прадугледжаны скідкі. Акрамя таго, з дапамогай карткі ААТ “ААБ Беларусбанк” можна аплачваць камунальныя паслугі ў інфакіёсках, а некаторыя іншыя—праз сістэму “М-банкінг”.
Падрыхтавала А. ЮШКЕВІЧ,
дырэктар ЦБП №213.